ءبىلىم بەرۋ سالاسىندا جاسالعان زەرتتەۋلەردىڭ قورىتىندىسى بويىنشا, وقۋ اقىسى 38 مىڭ دوللارمەن ەڭ قىمبات ەل – اقش, ال 4 مىڭ 500 دوللارمەن ەڭ ارزان ەل قازاقستان ەكەنى انىقتالدى.
شەتەلدە ءبىلىم الۋ تۋرالى زەرتتەۋلەرىمەن تانىمال «Akare» كومپانياسى 40-قا جۋىق ەلدە ۋنيۆەرسيتەتتىك ءبىلىم, جاتاقحانا جانە ستۋدەنتتەردىڭ ءومىر سۇرۋگە جۇمسايتىن شىعىنى تۇرعىسىنان قىمبات ەلدەردىڭ اقش, كانادا, شۆەتسيا, اۆستراليا ەكەنىن انىقتادى. زەرتتەۋ بويىنشا اقش ۋنيۆەرسيتەتتەرىندە ءبىلىم الۋدىڭ جىلدىق قۇنى كەمىندە 23 مىڭ دوللار, جاتاقحانا مەن ءومىر ءسۇرۋ شىعىنى 15 مىڭ دوللار, ال كانادادا بۇل كورسەتكىشتەر 20 جانە 14 مىڭ, ششۆەتسيادا 20 جانە 12 مىڭ, اۆستراليادا 13,5 مىڭ جانە 4,5 مىڭ دوللارعا تەڭ.
زەرتتەۋدىڭ ناتيجەسىندە, شەتەلدە ءبىلىم الۋ جونىنەن ەڭ ارزان ەلدىڭ 4,5 مىڭ دوللارمەن قازاقستان ەكەنى انىقتالدى. مەملەكەتتىك ۋنيۆەرسيتەتتەردە جىلدىق وقۋ اقىسى 500 دوللاردان باستالاتىن قازاقستاندا ءبىر ستۋدەنتتىڭ جاتاقحانا جانە قوسىمشا شىعىندارىنا جىل سايىن 4 مىڭ دوللار جۇمسالادى. قازاقستانمەن قاتار نورۆەگيا, فرانتسيا جانە المانيادا وقۋ اقىسى تومەن بولىپ شىقتى.
قازاقستاننان كەيىن 6 مىڭ دوللارمەن بوسنيا-گەرتسەگوۆينا, 7,5 مىڭ دوللارمەن گرۋزيا جانە 8 مىڭ دوللارمەن رەسەي تۇر. بوسنيا-گەرتسەگوۆينا, گرۋزيا جانە ۋكراينادا وقۋ اقىسى 2,5 مىڭ دوللاردان باستالسا, جاتىن ورنى مەن تاماقتانۋعا جىل سايىن كەتەتىن شىعىن كولەمى 5 مىڭ دوللارعا جۋىقتايدى. كانادادا جىلدىق وقۋ اقىسى – 20 مىڭ, اۆستراليادا – 12 مىڭ, شۆەتسيادا – 11 مىڭ جانە ەگيپەتتە 10 مىڭ دوللارعا جەتىپ جىعىلادى.
ستۋدەنتتەردىڭ جاتاقحانا مەن وزگە دە شىعىندارى تۇرعىسىنان اقش, ۇلىبريتانيا, دانيا ەلدەرى ەڭ قىمبات, ال قازاقستان ەڭ ارزان ەل بولىپ جاريالاندى. سالىستىرۋ ءۇشىن: ەگيپەتتە بۇل كورسەتكىش 5 مىڭ, ءۇندىستاندا 16,5 مىڭ, قىتايدا 12,5 مىڭ جانە مالايزيادا 10 مىڭ دوللاردان باستالادى.
وقۋعا جۇمسالاتىن شىعىنداردى ەسەپكە العاندا تۇركياعا قاراعاندا ەۋروپادا ءبىلىم العان ءبىرشاما ءتيىمدى ەكەنى انىقتالدى. اعىلشىن ءتىلدى اقش, ۇلىبريتانيا, كانادا سياقتى ەلدەرگە قاراعاندا, باتىستىڭ باسقا ەلدەرىندە ءبىلىم العان ارزانىراق بولىپ شىقتى.
تۇركيانىڭ «حۇرريەت» گازەتى,
2016 جىلعى 12 شىلدە